من ساعة ما بدأت المدونة وكل شوية يوصلني السؤال ده بصيغ مختلفة ومن أشخاص مختلفة .. منهم ناس عايزة تحبط الشباب وخلاص ومنهم ناس مقتنعة بإن البلد لازم تتغير بس مش فاهمين إيه الهدف اللي احنا بنحاول نعمله ومنهم ناس مش مقتنعة أصلا إن البلد محتاجة تتغير وشايفين إن الاستقرار مهم جدا ومصر مش سهل إنك تغيرها من غير ما تحصل مشاكل كتير إحنا مش قادرين نستحملها.
فكرت شوية هو أنا كمصري نفسي في ايه؟ وحبيت أسأل كل واحد فيكم نفسه في إيه لأن أكيد مشاكلنا مختلفة حتى لو كان سببها واحد ..
نفسي أحس إن لي صوت في بلدي .. باختار عضو مجلس الشعب بتاع دايرتي وباختار رئيس جمهوريتي .. مش عايز أحس إن صوتي مالوش لزمة وإن فيه تزوير بيحصل بغض النظر عن صوتي ورأيي .. مش عايز أروح لجنة الانتخابات فيقول لي: لأ خلاص إحنا صوتنا بالنيابة عنك ويضحك .. نفسي في ديموقراطية حقيقية مش مزيفة
نفسي الفساد يتحارب في البلد .. مش عايز أعرف إن الحكومة الأمريكية عاقبت مرسيدس لأنها دفعت رشوة لمسؤوليين حكوميين في دول ومنها مصر والحكومة اتفقت مع أمريكا إن إسم المسؤول ميطلعش لحد .. طب ليه؟ هو مش دي فلوس الشعب؟ ولما حد بيسرق بيتك من حقك تعرف مين هو وتشوفه بيتعاقب ويرجع اللي سرقه؟
نفسي المدرسين يغرزوا في الولاد والبنات حب العلم والتعلم .. مش سياسة الحفظ والصم .. ونفسي وزير التعليم بتاعنا يكون قامة علمية في مجال التربية .. والحكومة تدعمه بميزانية كبيرة لأن تعليم الأجيال الجديدة هو أملنا الوحيد لو عايزين نطور بلدنا .. احنا عندنا عقول رائعة بنضيعها كل سنة بسبب الاهمال
نفسي إن ضابط الشرطة يبقى زي زمان في الأفلام .. الشخص الوقور المحترم اللي بيراعي ضميره وبيتقي ربنا في السلطة اللي معاه .. يبقى متواضع بس حازم .. ميهينش اللي قدامه لمجرد إنه فقير ومعدم وفي نفس الوقت يرفع التحية لابن باشا لمجرد إن أبوه رجل أعمال مشهور .. نفسي يقفلوا التلاجات اللي في كل قسمعشان التعذيب .. ونفسي وكيل النيابة يبقى فعلا وكيل عن الشعب ويمثلنا ويراقب الضباط بشكل حقيقي
نفسي نبطل واسطة ومحسوبية في البلد .. مش عايز أعرف إن ابن نقيب المحاميين اتعين وكيل نيابة رغم إنه جايب مقبول .. ولا عايز أعرف إن فلان الفلاني أخد حتة أرض بسعر التراب لأنه صاحب الوزير الفلاني
نفسي الرشوة تبقى جريمة كلنا بننكرها .. بدل ما نكون متعودين عليها .. ونفسي الشخص اللي يطلب رشوة يكون هو الغريب والمجنون مش العكس
نفسي الحكومة تراجع طريقتها في توظيف الناس .. ملايين من الموظفين في الحكومة محدش بيستغلهم ومهاراتهم مع الوقت بقت ولا حاجة غير قراءة الجرائد وقزقزة اللب ده لو حضروا أصلا .. نفسي كمان الناس اللي بتشتغل وبتتعب ميكونش مرتبه في الآخر 500 جنيه يصرف نصهم مواصلات ويضطر يقبل الرشوة ويدخل الحرام لبيته
نفسي الحكومة تبطل تتعامل مع الشعب على إنه شوية أطفال مش قادرين يفهموا فمضطرين يضحكوا عليهم .. الموضوع ده تسبب إن كلنا فقدنا الثقة في حكومتنا وأحيانا بتكون فيه أخبار حلوة وحقيقية والناس لمجرد إن خلاص عامل الثقة مبقاش موجود بيشككوا في الأخبار وبيعتبروها مؤامرة جديدة لتحسين الصورة
نفسي الشعب يتعامل مع بعضه من غير طبقية .. والناس تبطل تأليه الأشخاص .. صحيح ربنا خلقنا غني وفقير بس ده ميمنعش إن المعاملة تكون متشابهة .. يا ريت نتعلم دي من الناس الأجانب اللي بتلاقي الشخص اللي سايق مرسيدس زي الشخص اللي سايق فيات .. محدش ليه أفضلية ولا احترام عن الآخر في حقوق الإنسان .. لأن أصلا داء الكبرياء بييجي للناس لما بيحسوا إن اللي حواليهم مديينهم أكتر من حقهم .. زي مثلا لما بنقول كلنا للظباط يا باشا
نفسي المسؤول الحكومي يبقى فاهم إن معظم الإيرادات اللي بتحققها الدولة في الموازنة العامة من ضرائب الشعب .. وإنه بصفته موظف حكومي مرتبه ده من ضرائب الشعب .. يعني الفلوس اللي أنا وأنت وأي حد تاني بيدفعها شهريا للشركة (اللي هي الحكومة) هي اللي بتتسبب إنه ياخد مرتبه .. فيبدأ يتعامل مع الناس من منطلق إنه موظف عندهم مش مدير عليهم .. عمركم كلمتم الدعم الفني لشركة محمول ولقيتوا الشخص بيتنطط عليكم؟
نفسي نتخلص من السلبية اللي معرفش زرعوها فينا بقصد ولا بدون قصد وزرعوها ازاي .. بقينا من الشعوب اللي متأخرة تقريبا في كل حاجة ومتقدمة في الحاجات السلبية بس .. طب ليه؟ ليه كلنا عمالين نقول: البلد دي بلدهم وياكش تولع وأنا مالي هو أنا هاغير الكون
نفسي نتعلم نختلف من غير ما نشتم بعض .. نفسي يكون فيه مسلم معتز بدينه وشايف إن المسيحي غلط .. ومسيحي معتز بدينه وشايف إن المسلم غلط بس الاتنين بيتعاملوا مع بعض باحترام وبيفرضوا في بعض حسن النية .. ومعندهمش خطوط حمراء في الكلام بيتكلموا بحرية واحترام مع بعض .. ومش خايفين من بعبع اسمه فتنة طائفية ضحكوا عليه بينا .. نفسي نفهم إننا كلنا مصريين وفي الدنيا حقوقنا متساوية وربنا هو اللي هيحاسبنا في الآخرة
نفسي منختزلش علاقتنا بالدين بإننا نسبح مائة مرة ونصلي على النبي خمسين مرة ... لأن الدين أصلا ربنا عمله منهج لحياة الإنسان والدين بيعلم الإنسان الإيجابية والبناء والمودة والرحمة وحسن الخلق والعدل ومحاربة الظلم .. كفاية إن الرسول صلى الله عليه وسلم قال: إنما بعثت لأتمم مكارم الأخلاق
نفسي نحب بعض .. نحب بعض بجد .. بقى عندي إحساس غريب إن الناس بتستغرب أي حاجة حلوة حواليها .. لو حد اجتهد وبيعمل حاجة عشان بلده يبقى أكيد عميل أو ممول من بره .. أو على أقل تقدير بيحاول يكسب شهرة .. ليه بقت مشاعر الغيظ والكراهية وسوء الظن طاغية على مشاعر الحب والوفاء وحسن الظن؟
على فكرة .. من حقي أحلم ومن حقي أسعى لتحقيق حلمي .. ومن حقك تحلم .. وبجد لو بطلنا نحلم نموت
ليست هناك تعليقات:
إرسال تعليق